Kunfidenzjalità fil-Counselling mal-Presbiteri

Bħala presbiteri u aħwa fi Kristu, aħna nassigurawk li l-mottiv ewlieni tagħna fil-counselling huwa l-imħabba, bl-għan li niggwidawk skont l-għerf tal-Kelma t’Alla.

Aħna nwegħduk konfidenzjalità kundizzjonali. Dan ifisser impenn sħiħ li ma niżvelawx informazzjoni personali miksuba waqt il-counselling lil ħaddieħor sakemm ma jkunx meħtieġ, u li se nagħmlu kull sforz sabiex ngħinuk issolvi l-problemi tiegħek bl-aktar mod privat possibbli.

Madankollu hemm ċirkostanzi fejn ikun meħtieġ li niżvelaw informazzjoni ma’ ħaddieħor, fosthom ma’ dawn li ġejjin:

• persuni jew aġenziji, għall-protezzjoni tiegħek nnifsek, jekk naħsbu li saħħtek jew ħajtek qegħdin f’periklu;
• persuni jew agenziji, għall-protezzjoni ta’ persuni oħra, tfal u adulti, jekk naħsbu li huma f’periklu minn kwalunkwe ħsara jew abbuż;
• adulti u l-ġenituri ta’ tfal, sabiex ikunu mgħarrfa li huma jew uliedhom huma f’xi periklu jew abbuż;
• lil aħwa Kristjani oħra, u saħansitra lill-knisja, skont il-proċedura ta’ dixxiplina bibblika (Matt. 18:15-17; 1 Kor. 5:2-13; Gal. 6:1-2);
• jekk inkunu mitluba mill-Qorti tal-Ġustizzja jew xi awtorità leġittima oħra.

Filwaqt li ġeneralment infittxu l-kunsens tiegħek qabel niżvelaw xi informazzjoni, aħna moralment obbligati li nagħmlu dan anke mingħajr il-kunsens, u saħansitra kontra r-rieda tiegħek.

Nenfasizzaw li l-għan tagħna huwa li ngħinu lilek u lill-persuni oħra involuti, billi nimxu skont l-imħabba, u l-għerf tal-Kelma t’Alla. Fil-prattika dan ifisser li ġeneralment inkunu nistgħu nżommu l-informazzjoni personali privata, ħlief f’ċirkostanzi rari bħal dawk elenkati hawn fuq.